Debagoieneko Kantariren 9. edizioak izan du lekua Arrasaten. Maiatzaren 17an eta 18an, Amaia antzokiko oholtza gaztetxeoz bete zen: Arrasateko 7 eta 12 urte arteko 38 taldeek parte hartu zuten ikuskizunaren grabaketan.
Talde bakoitzak aurrez aukeratutako kanta bat interpretatu zuen, dantza eta koreografiarekin batera. Emanaldi guztien grabaketak maiatzaren amaieran emitituko dira Goiena Telebistan.
Kantu eta eszenografia berriak
Aurtengo edizioan indarberrituta etorri da karaoke ikuskizuna. Izan ere, kantu berriak estreinatu ditu saioak: Besteak beste, En Tol Sarmientorenak, Hutzarenak, Nogenenak eta Kai Nakaienak. Honekin batera, eszenografia berria izan du edizio honek. Parte hartu duten gaztetxoek, aurreko egunetan asko prestatu dituzte euren ikuskizunak. Gainera, egunean bertan makillaje eta arropak prest eraman zituzten.
Musika eta eszenografia ez dira aurtengo berritasun bakarrak, saioa hasi aurretik, koloretako argi-makilak eskuratu ahal dira, eta hauek publikoaren artean nabariak dira. Goienakide direnek gainera, poster bat ere jasoko dute opari Kantarin parte hartu izana gogoan izateko. Eta ez direnek, zuzeneko saioetan jartzen den Goienakide gunera joanda edota Goienara deituta, Goienakide egiteko aukera daukate, ondoren, besteak beste, posterra eskuratu ahal izateko.
Goiena telebistan
Zapatuetan eta domeketan estreinatzen dira Goiena telebistan Kantariren saio berriak, eta astean zehar ere eskaintzen dira horiek gero. Orain, Aretxabaletan grabatutako saioak emititzen dabil Goiena; bertan parte hartu zuten Aretxabaletako eta Eskoriatzako gaztetxoen saioak. Eta horien ostean, maiatza amaiera inguruan ikusi ahalko dira Aretxabaletan asteburuan grabatutako saioak. Gainera, behin telebistan emititutakoan goiena.eus webgunean egongo dira ikusgai.
Oraindik kantarik badu beste geldialdi bat bailaran, grabazioa egingo den bailarako hurrengo eta azken herria Oñati izango da, maiatzaren 24ko eta 31ko asteburuetan.
