Sirena hotsekin hasi zituzten elkarretaratzeak bailarako hainbat herritan eta Leire Vargas bertsolariak idatzitako poemak ere ozen irakurri zituzten. Ia urtebete igaro da Gernika-Palestina herri ekimena martxan jarri zutela, Palestinan gertatzen ari den sarraskiagatik. Eta asteleheneko elkarretaratzeekin berriro ikusarazi nahi izan dute, urtebeteren ondoren ere, sarraskiaz hitz egiten jarraitzen dutela.
Adierazi dute hasieratik, ekimenaren helburua izan dela "gure herrian ahalik eta erantzun zabalena eta transbertsalena artikulatzea", mobilizazioei garrantzia emanez. Horren bidez, euren "elkartasuna bideratuz eta instituzioak zein nazioarteko komunitatea interpelatuz".
Dena den, azpimarratu dute ahalegin horretan "ez etsitzea", ez diotelako itxaropenari ateak itxi nahi. Eta beste behin "berehalako su-etena eta genozidioaren amaiera" aldarrikatu dituzte ozen, "munduan Gernika gehiago egon ez daitezen, bakearen eta justiziaren aldeko deiadarra" eginez.
Elkarretaratzeak bailarako hainbat herritan egin dituzte: Arrasaten, Bergaran, Oñatin, Aretxabaletan, Eskoriatzan, Antzuolan eta Elgetan.
