2025eko Euskaraldia hasteko atzera kontaketa hasi da, eta Debagoienean ere hasi dira lehen urratsak egiten. Arrasaten, adibidez, udaberrian hasi ziren egitekoak zerrendatzen eta Bergaran ere jarri dira datorrenari begira. Batean zein bestean, elkarlanean ari dira Udalak, euskara elkarteak eta euskalgintzako eragileak, eta dinamizatzailea edo arduradun nagusia bilatzeko lan deialdia ere egina dute.
Aurreko hiru aldietan udazkenean aurrera eramandako ekimena udaberrian egingo da oraingoan, eta antolakuntza lanetan dabiltzanek aldaketa onerako izango dela diote. Are gehiago, egiteko moduak berritzea ere bada beste nobedadeetako bat, alde sozialaren presentzia indartu nahi baitute.
Euskaraldia On! Topaketa
Euskaltzaleen Topaguneak antolatuta, Euskaraldia On! Topaketa egingo dute bihar Eibarko Eliseo Coliseo antzokian, eta laugarren edizio honekin bat egin asmo duten herrietako ordezkari oro dago gonbidatuta. Debagoieneko ordezkaritza zabala bertaratuko da, eta hasiera emateko modu ona izango dela diote, zalantzak edo ideiak partekatu eta lehen urratsak elkarrekin egiteko.
