Hala, Arrasaten, Bergaran zein Oñatin izan ohi diren hitzaldietan parte-hartze altua nabarmendu du Jesus Mari Ugartek, eta gaineratu antolatzen dituzten bestelako ikastaro, ikuskizun, askotariko irteera eta mendi-ibilaldietan ere gero eta jende gehiagok ematen duela izena: "Hitzaldiak dira jende gehien erakartzen duten ekintzak, eta horietan bataz-beste 90 lagun inguru elkartu dira. Bestelako ekitaldietan ere gero eta jende gehiagok parte hartzen du".
Hitzaldien artean, geopolitikarekin eta osasunarekin lotutakoek izandako harrera azpimarratu du Ugartek: "Geopolitikari buruz hitz egiteko gonbidatu finkoak diren Juanjo Alvarez eta Asier Blas ditugu, esaterako. Eta osasun kontuetan, erreferentea den Felix Zubia. Era horretako hitzaldiak dira jende gehien erakartzen dituztenak; normalean 100 lagunetik gora elkartzen dira".
Azken ikasturte honetan bazkide kopurua 230etik 250era igo dela gaineratu du Goienagusiko lehendakariak, eta ekimena aurrera eroan ahal izateko dituzten zortzi lan-taldeetan zein zuzendaritzan jende berria behar dela. Era berean, jendea Goienagusira batzera ere animatu du: "Ekintza interesgarriak egoten dira eta denbora pasatzeko zein ikasteko aukera ona dira".
