Ekitaldi xumea baina goxoa egin dute beste urte batez, Karmele Igartua poeta eta idazle aretxabaletarra gogoan, haren izena daraman 2023ko lehiaketako saria banatzeko.
Ikasleei bideratutako antzezlanak eskatuta, sei lan jaso dituzte; epaimahaiko kideen esanetan "maila handiko" lanak guztiak ere eta pozik agertu dira horregatik. Guztien artetik, baina, bi nabarmendu direla adierazi du epaimahaiko kide Pako Aristi idazleak, eta bi horien artetik Idoia Etxeberria idazle eta kazetari oñatiarrak idatzitako Arraroa da normalena lanak jaso du sari nagusia.
Zortzi zomorroren bereziren abenturekin osatu du lana Etxeberriak: "Armiarma zuri bat, hegorik gabeko euli bat, matxinsalto hanka-oker bat... dira protagonista. Eta azkenean, duten berezitasun hori da normalena antzezlan honetan". Oso pozik agertu da sariarekin; izan ere, umeendako idatzitako lehen lana izan da harendako, nahiz eta beste estilo batzuetan hainbat sari jasotakoa izan.
Goizeder Iturain ere pozik zen bukaeran, aipamen bereziarekin. "Orain dela zazpi urte irabazi nuen sariketa hau eta nire ibilbidea hortxe hasi zen, hortaz, oso berezia da niretzat". Argi ilunak lanean jaso du mutiko batek galdera bati erantzuteko egiten duen ahalegina hainbat pertsonari galdetuta: "Galdera berak milaka erantzun jaso ditzakeela ikusiko du eta guztiak egokiak".
Sarituak izan diren idazleek zein Idazle Eskolako kideek ikastetxeak gonbidatu dituzte lanak oholtzara eramatera: "Ia Aretxabaletan bertan animatzen diren horretara eta hala bizitza eman lanei". Dena den, lanak eskuragai izango dira www.idazten.com atarian eta edonork erabili ahal izango dituela jakinarazi dute.
Ekitaldia borobildu dute Igartuaren hainbat poesia irakurrita.
