Batzarkideek ordu erdiz izan zuten gaia eztabaidagai atzoko saioan. EH Bilduko batzarkide Oskar Bordesek gertatutako hainbat intzidentziaren berri eman zuen eta horrekin batera gogorarazi zuen Aldundiak onartuta daukala erabiltzaileei, langileei eta zerbitzuaren segurtasunari zein kalitatearen eragiten dion Avanza enpresaren mantentze-definizita, baina egoerak kezkagarria izaten jarraitzen duela esan zuen. "Noiz arte egon behar dira, kasu honetan, debagoiendarrak Gipuzkoako bigarren mailako biztanle izaten?", galdetu zuen.
Erantzunean, foru diputatuak ezer gutxi esan zuen zerbitzuaren maiztasunen edo autobus kopuruen inguruan. Azahara Dominguez foru diputatua azken asteetan Mugikortasuneko zuzendaritza berriak aplikatutako mantentze-kontrol prozeduretan zentratu zen. Hainbat datu eman zituen eta azpimarratu zuen jarraipen horri esker behera egin duela bai erabiltzaileek jarritako kexa kopuruak, bai gidariek erregistratutako intzidentzia kopuruak. "Datuek jaitsiera nabarmena ematen dute eta sailak azken hilabeteetan egin duen kontrolaren ondorioz, eta bide horretan jarraitu nahi dugu. Gorabehera guztien kontrola egiten da bakoitza bere datarekin eta dagokion jarduketarekin. Era berean kontrol osagarria egiten da gailuak berritu edo mantendu direla egiaztatzeko", azaldu zuen Dominguezek.
Foru diputatuak jakinarazi zuen Avanzako langileekin elkartzekoa dela gaur. EH Bilduk bestelako lanketa bat eskatzen du; langileak, enpresa eta Aldundia elkartuko dituen jarraipen batzorde baten eraketa.
