Goiena Komunikazio Taldeak jarraipen gertukoena, uneorokoa eta zabala egingo dio domekan hauteskunde egunari, Goiena.eus-en, Goiena telebistan eta GOIENA aldizkarian, goizean goizetik, hauteslekuak irekitzen dituztenetik. Goiena telebistak zuzeneko saioa eskainiko du 19:45ean hasita, Txomin Madinak eta Goiatz Aranak aurkeztuta, eta Elena Laka izango da platoko kolaboratzailea. Gainera, berriemaileak Debagoieneko herri guztietan egongo dira, azken berriak zuzenean kontatzeko lekutik bertatik. Goiena.eus-en emaitzak zuzenean emango dira, botoak zenbatzen joan ahala.
Bestetik, GOIENA aldizkariak zortzi orriko zenbaki berezia argitaratuko du biharamunean, hauteskunde egunak emandako datu guztiekin. Egunkari-saltokietan, okindegietan, kafetegietan eta beste hainbat toki publikotan eskuratuko ahalko da, doan, lehen orduan. Gainera, Goienakideek etxean jasoko dute.