Gipuzkoako Batzar Nagusietako EH Bilduren batzarkide Oskar Bordesek esan du azken bi legegintzaldietan Diputazioak murrizketak egin dituela Debagoieneko garraio publikoan. Ondorioz, auto pribatuaren erabilera handitu egin dela esan dute. "2016ean %39,2koa zen, eta 2021ean, %42,2koa. Horrek argi erakusten du, garraio politikak porrot egin duela", esan du.
Hala, EH Bilduk konpromisoa hartzen du Aldunditik Debagoienean autobus zerbitzua hobetzeko: flota berritu, maiztasuna handitu, linea berriak sortu (adibidez, Oñati eta Bergara lotu zituen linea zuzena) eta garraioa segurua izateko neurriak hartu.
Konexio mugatua
Mugikortasun politikei erreparatzea behar urgente bat dela esan dute EH Bilduren ordezkariek. Ikuspegi integral batekin irtenbideak "gaurdanik eraikitzen" hasi behar direla esan dute, "udalen arteko elkarlana indartuz" eta "diputazioarekin proposamen zehatzak garatuz". Oñatiko alkate Izaro Elorzak azpimarratu du bailarako herrien arteko konexioa "oso mugatua" dela, eta herri txikien egoera, oso larria.
Bidegorri sarea "amaitzeko konpromisoa"
Azkenik, eskualdeko bidegorri sarea izan dute mintzagai. Salatu dute, azken bi legegintzaldietan Aldundiak ez duela ezer egin Debagoieneko bidegorri sarea amaitzeko, ez eta bizikletaren erabilera sustatzeko.
Konpromisoa hartu dute bizikleta bideak osatzeko eta egunerokotasunean bizikleta garraio modu erakargarria izateko egitasmoak martxan ipintzeko.
