Arlaban, Elgeamendi, Gatzagain, Isuskitza, Durakogain, Larrangoiti, Trango eta Naparbaso dira planak jasotzen dituen bailarako guneetako batzuk eta, Jaurlaritzaren arabera, lurraldearen gaineko egokitasun "altua edo ertaina" daukate aukeratutako kokapen guztiek; hau da, urteko haizearen batez besteko abiadura segundoko 6,22 metro da, eta gutxienez bi kilometro luze dira, jarraian edo etenekin.
Eusko Jaurlaritzak adierazi duenez, proiektu horrekin lortu gura dutena da 2030erako energia berriztagarrien hazkunde handi bat lortzea, ordurako ezarritako helburuak lortzeko. Hain zuzen, urte horretan energiaren bukaerako kontsumoaren %21 berriztagarrien bidez lortzea da asmoa, gaur egun %10ekoa izanik.
Plan sektorialak eskala handiko parkeak soilik aurreikusten ditu, 30 megawatt baino potentzia handiagokoak eta bost haize errota baino gehiagokoak. Kontuan hartu behar da, gainera, 50 megawatt baino potentzia handiagoa dutenak Espainiako Gobernuak kudeatzen dituela.
Plano guztiak ikusgai daude, hemen.
Alegazioak aurkezteko epea, zabalik
Plan sektorialak jasotzen dituen kokapenak balizkoak dira oraindik, ez dira behin-betikoak eta udalek zein herritarrek 45 eguneko epea izango dute alegazioak aurkezteko eta ekarpenak egiteko.