Egoeraren larritasunak bultzatuta, denbora gutxian antolatutako elikagai bilketak egin dituzte gaur Arrasate, Aretxabaleta eta Oñatiko hainbat saltokitan. Lehenengo bietan Zaporeak-ek antolatuta, eta hirugarrenean, Hotz Oñatik.
“Hemen inguruan lanean zebiltzan taldeak zertan zebiltzan ikusi, eta jakin genuen Zaporeak-ek Siriara laguntza bidaltzeko asmoa zuela. Hala, Oñatikoaren kargu geu egin gara. Bizpahiru egunetan antolatu dugu eta gaurko egunerako bakarrik, baliabide gehiago ez geneuzkalako”, azaldu du Hotz Oñatiko kide Edurne Bikuñak Arantzazuko Ama kaleko Eroskin produktuak jaso eta sailkatu bitartean.
Beste janari bilketa batzuekin alderatuta, bada alderik. “Arroza, pasta, lekaleak, kontserbak, esnea eta galletak ari gara eskatzen. Baina jendeak bestelako materiala ere ematen digu, pixoihalak eta konpresak, adibidez”, azaldu du Bikuñak, eta jendearen erantzuna ikusita, eskerrak ematea besterik ez zaiela geratzen gaineratu: “Herritarrek ekarpen handia egin dute”.
2.000 kilo arropa inguru
Herritarren laguntzeko borondatearen adierazle, asteon martxan jarri duten neguko arropa bilketa da: “Beraz sei egunerako aurrikusten genuen, baina hirugarrenean bukatutzat eman behar izan genuen. Gaur esan didatenez, 2.000 kilo arropa batu dira gutxi gora behera . Horiek Bilboko DYAren bidez bideratuko dugu”, adierazi du Edurne Bikuñak. Aurrera begira elkartasun ekimen gehiago antolatzeko beharra egongo dela ere nabarmendu du, eta seguru dagoela herritarrek orduan ere erantzungo dutela.
Ekintza gehiago antolatu bitartean, ES08 3035 0005 3300 50078053 kontu korrontean eta Bizum bidez 05103 zenbakian ere ari dira diru ekarpenak jasotzen.
Bergaran ere bai
Bergaran ere materiala jasotzen ibili dira gaur Ndank Ndnak elkartearen ekimenez lurrikarek kaltetutako herritarrei laguntzeko. Hala, lozakuak, mantak, txamarrak, txanoak eta eskularruak batu dituzte.
