Harrera-programaren inguruko xehetasunak eman ditu Lezanak, eta bere esperientziaren berri eman du Kortabarriak. Hain zuzen ere, lau bat urte dira Naroa alaba Kortabarriaren familiara heldu zela. Inoiz hartu duen erabakirik onena izan dela azaldu du arrasatearrak eta gizartean nagusi diren hainbat uste oker gezurtatzen ditu.
Gaur gaurkoz 26 haur bizi dira Debagoieneko harrera-familietan. Gipuzkoako Foru Aldundiak kudeatzen du harrera-familien programa, eta jakinarazi badute ere lurraldean 73 adingabe daudela familia baten zain dauden zazpi neska-mutikoren kasua bereziki premiazkoa dela esan dute.
Gipuzkoako harrera-programak 33 urte bete ditu, eta une honetan 403 haur eta gazte bizi dira 350 harrera-familietan. Familia interesatuek hainbat bide dituzte harrera-programaren arduradunengana heltzeko: familiaharrera@gipuzkoa.eus edo 943 11 25 22.
