Oñatin belar artifizialeko zelaia ebaki dute dagoeneko, eta datozen egunetan erretiratuko dute. Zenbait puntutan ura xurgatzeko arazoak antzemanak dituzte, eta zentzu horretan ekintzaren bat egin beharko dute agian.
Lan gehiago ere egingo dituzte, baina nagusia belar artifizial berria ipintzea izango da. Hamar urteko biziraupena izan ohi dute zelaiok, eta hamalau ditu Azkoagainekoak.
Lanak irail hasierarako amaituta egotea da asmoa. Denboraldiaurreko entrenamenduak Larrañan egingo dituzte beheko taldeek, eta talde nagusiek Antzuolan eta Legazpin egitea da asmoa. Lagunartekoak ere etxetik kanpo jokatu beharko dituzte, eta denboraldia hasterako lanak amaituta egotea litekeena izan arren, irailaren 25era arteko jardunaldiak etxetik kanpo jokatzea eskatu dio Aloña Mendik federazioari.
Agorrosin
Bergaran aurreko astean hasi ziren Agorrosingo lanak. Lehen fase batean, belar naturala kendu eta artifiziala jartzea izango da egiteko nagusia, eta hondeamakina lanean ari da egunotan. Lanak urrian amaitzea da aurreikuspena: talde nagusiek, beraz, denboraldi berriko lehen partiduak Ipintzan edo inguruko zelairen batean jokatu beharko dituzte, Ipintzako neurriak ez baitira egokienak.
Ibarra
Eta Aretxabaletak ere zelai berriarekin jokatuko ditu datorren denboraldiko partiduak. Bihar dira zaharra kentzen hastekoak, eta hurrengo astean ekingo diote berria jartzeari. Lanak lau aste eta erdian bukatzea aurreikusi dute, eta denboraldi berrirako futbol zelaia gertu izatea.
