Oñatiko Trianan, astotrastok ekarri zuen alaitasuna. Adin guztietako jendearendako ekintzak antolatu zituzten; eta, beti bezala, umeak eta gaztetxoak gustura ibili ziren txorimaloen eta erraldoien aurrean korrika.
Urte luzeetako ohitura duen kafe ilintia ere egin zuten auzoko emakumeek zapatu arratsaldean. Lapikoan egindako kafeari sutan egondako egur zati bat sartzen diote, eta horrek gustu berezia ematen dio kafeari.
Bergarako Aldaiegian pinua
Bergarako Aldaiegia auzoan, San Kristobal eguna ospatu zuten atzo, uztailak 10. Ohiturari jarraituz autoak bedeinkatu zituzten ermitaren aurrealdean. Jende asko erakartzen duen ekitaldia izan ohi da, baita aurten ere.
Egubakoitzean 22 metroko pinua altxatu zuten, eta lehenengo ahaleginean jausi egin zen arren, zutik eta polit egon da asteburu guztian ermitaren aurrealdean.
Arrasaten parrillada
Arrasateko Santa Teresa eta Doneztebe Portuko auzuneetan ere jaiak izan dituzte. Parrillada egin zuten zapatuan eta baita bingoa ere. Irabazleei meloi bat eta sandia bat oparitu zizkieten, eta auzoko Xalo ile-apaindegiak hainbat zerbitzu zozkatu zituen.
