Espainiako Osasun Publikoko Batzordeak hala erabakita, gaurtik aurrera ez dute berrogeialdirik egin beharko positibo eman baina asintomatiko izan edo sintoma arinak dituzten herritarrek. Txanponaren beste aldean, Eusko Jaurlaritzak eta Nafarroako Gobernuak eguneratutako datuek positiboek iragan asteetako balioak gainditzen jarraitzen dutela adierazten dute.
Debagoienean, esaterako, %42 hazi da kutsatu kopurua bi astetan; hots, 81 izan dira azken zazpi egunetan hautemandako kasuak, eta 57 izan ziren martxoaren 7tik 13rako astean. Oñatin (+8) eta Elgetan (+1) ere kasuek gora egin duten arren, Eskoriatzarena da kasu adierazgarriena. Martxoaren 3tik 20ra beste herritarri atzeman zaie gaitza azken zazpi egunetan: 11.
- Grafiko eta datu guztiak ikusgai daude goiena.eus-eko azken datuak atalean.
55 puntu gora
Bi asteko denbora tarte berean 249,97an kokatu da intzidentzia-tasa; zehazki, martxoaren 13an baino 55 puntu gehiagoan. Nafarroan (627,15), Araban (509,07) eta Bizkaian (474,74) tasak gorantz jarraitzen duen arren, Gipuzkoan bilakaera aldaketa egon da; 545etik 470era jaitsi da balioa azken hamar egunetan –lerro urdina–.
Antzuola, gorrira
Duela bi aste bost herri zeuden eremu gorritik kanpo; gaur, baina, Leintz Gatzagak eta Elgetak soilik eusten diote 150etik beherako intzidentzia-tasari. Zehazki, 0,00an da tasa Gatzagan, eta eremu berdean jarraitzen du bosgarren eguneraketaz jarraian; Elgetak, berriz, hilabete bete du eremu gorritik kanpo, eta 88,42an da intzidentzia uneotan.
ZIUak arintzen
Ez gora ez behera, ospitaleratu kopurua 220 herritarren bueltan egonkortu da martxoaren bigarren hamabostaldian; 225 herritar zeuden martxoaren 15ean, eta atzo, berriz, 227. Zainketa Intentsiboen Unitateetan, baina, presioa arintze bidean da. Izan ere, arreta berezia behar duten herritar kopuruak beherantz jarraitzen du; 21 ziren atzo. Hildakoei dagokionez, azken astean 68 herritar hil dira gaitzarekin.
