Atzo arratsaldean bildu ziren Espainiako Osasun Ministerioko eta autonomia erkidegoetako osasun ordezkariak Osasun Publikoko Batzordean. Egoera epidemiologikoaren irakurketa egin zuten, eta "biztanleriaren immunizazio maila altuak –12 urtetik gorako populazioaren %92ak jaso du txertoa– epidemiologian aldaketa" ekarri duela ondorioztatu zuten. Beraz, estrategia aldatu eta pertsona zein esparru zaurgarrietan jarriko dute aurrerantzean fokua, "kasu larriak" gertutik jarraitu asmoz.
Hala, herritar ororengan eragin zuzena duen erabakia hartu zuten: proba diagnostikoetan positibo eman arren, sintomarik ez duten edo sintoma arinak dituzten pertsonek berrogeialdirik ez egitea. Astelehenetik aurrera sartuko da indarrean neurria.
Proba diagnostikoak
Horrez gain, proba diagnostikoak egiteko irizpideetan ere aldaketak egiteko erabakia hartu zuten. Hemendik aurrera pertsona zaurgarriei soilik egingo zaie testa; nola adinekoei, hala immunoeskasia dutenei, patologiaren bat dutenei edo haurdun direnei.
