Modu askotan deitzen zaie euskal lurraldeei. Ze ondorio ekarri ditu horrek?
Identifikazio aldetik, ondorio latzak. Adibide bat aipatzearren, Oihana Azkorbebeitia korrikalaria Italiako munduko txapelketan 10. postuan sailkatu zela ikusi nuen, eta bere elastikoak Euskal Herria, Euskadi eta Basque Country zeukan idatzita. Pentsatu nuen: nork jakingo du Italian nongoa den atleta hau?
2017an ere idatzi zenuen antzeko saiakera bat: Vasco, ¿cómo se llama tu país?
Eta hau ekarpen helduagoa da, hura argitaratu ostean ateratako ondorioetatik abiatzen dena. Metodologia soziologiko bat aplikatzeko beharra ikusi nuen; hala, sei izeni indargune eta ahulguneak bereizi nizkien, eta faktoreak aplikatu, bakoitza bere ponderazio eta balioekin.
Baskonia izena da zuretzat aproposena. Zergatik?
Euskal Herriari deitzeko glotonimorik zaharrena da, IV. mendekoa, eta gaur arte erabili izan da. Gure zazpi probintziak Euskal Autonomia Erkidegoan, Nafarroako Foru Komunitatean eta Iparraldeko Euskal Hirigune Elkargoan daude administratiboki zatituta. Planteatzen dudana da esparru horiek izen orokorrarekin komunikatuta egotea; hau da, ordena bat ezartzea. Baskonia izango litzateke izen orokorra, eta gero, egon daitezke Baskonia mendebaldea, iparraldea... Horrela, denok jakingo genuke Baskonia handiago bat dagoela.