SATSE, ELA, LAB, CCOO eta UGT sindikatuek greba orokorra deitu dute Osakidetzan. "Gaur amaituko da greba historikoen fase bat Osakidetzan. Ikusiko dugu azkenak izango diren edo laster gehiago egingo ditugun", azaldu dute bailarako ordezkariek.
Duela hamahiru urte sinatutako akordioa berritzeko "borondate falta" eta Osasun Sailaren kudeaketa salatu dituzte: "Lotsagarria da, egoerak hala eskatu duenean, profesionalok eta herritarrok sakrifizio handiak egin izana, eta, aldi berean, osasunaren kudeatzaileak prekarietatean sakontzen aritu izana".
Eskaera zehatzagoei dagokienez, besteak beste, honakoak adierazi dituzte: 2023ko aurrekontua handitzea –%25a lehen arretara bideratuz–; lanpostuak sortzea "lan-zama arintzeko"; 24.600 langileri eragiten dien behin-behinekotasunarekin amaitzea; erretiroak, bakanteak, bajak eta bestelako absentziak osorik eta lehen egunetik betetzea; edota "kontziliazioan laguntzeko neurriak" hartzea.
Jarraipenaren inguruko datuak
Sindikatuen arabera "greba historikoa" izan da gaurkoa, eta Osasun Sailarentzat, aldiz, "%9,36ko jarraipena" izan du grebak.
