Arrasaten, atzo egin zuten lehen asanblada irekia. Beste urte batzuetan baino emakume gutxiago agertu ziren, eta oraindik egitaraua zehaztu ez badute ere aurreratu dute Martxoaren 8ko manifestazioa Biteri plazan hasi eta bukatuko dela. Ahalik eta herritar gehien elkartzea nahi dute, baina ahal duten heinean eta pilaketak ekidin nahi dituzte. Arrasateko mugimendu feministak beste bilera bat deitu du otsailaren 23rako, Kulturateko areto nagusian, 18:30ean.
Oñati ari da aurreikuspen handienarekin
Oñatin ere ari dira Martxoak 8ari begirako ekitaldiak prestatzen. Egunari lotutako kanpaina egingo du Oñatiko Udalak, eta sare feministak, berriz, ekintza bat baino gehiago ditu dagoeneko lotuta, gehienak aurreko asteburuan egiteko. Bargastak talde feministak, esaterako, bazkari feminista antolatu du martxoaren 5erako. Kontzertuak ere egongo dira. Domekan, berriz, Martxoak 8an egingo den manifestaziorako kartelak eta mezuak egiteko tailerra egingo dute gaztetxean txokolate beroa hartuaz.
Bergaran, Martxanteren zain
Bergaran, Martxanterek asmoa dute aurten manifestazioa egiteko baina oraingoz ez dute ezer zehaztuta. Adierazi dute seguruenik datorren astean egingo dutela deialdia. Era berean , Berdintasun Kontseiluaren azken bileran hasi ziren martxoaren 8ko lanketarekin, baina ez da zehaztu oraindik zer egingo den. Bergarako Udalak, ohikoa duenez, martxoaren 8ko testuinguruan kultura ekimenak gai horri lotuta egingo dira, esaterako, Aroztegi aretoan Bergarako emakumeen erakusketa, antzerkia, musika emanaldiak…
Aretxabaleta eta Eskoriatza
Aretxabaletan, lehenengo batzarra otsailaren 15ean egingo dute Arkupen, 19:00etan. Eskoriatzan, berriz, badago nobedaderik. Izan ere, bideo lehiaketa bat antolatu dute lehenengoz, Femideo izenarekin bataiatu dutena. Gehienez bost minutu irauten duen edozein motatako bideo bat bidali behar da whatsappez 688 87 00 53 telefono zenbakira. Martxoaren 6ra arte dago aukera parte hartzeko.
Gainerako lau herriak, hasteke
Antzuolan, Elgetan, Aramaion eta Leintz-Gatzagan ez dira oraindik Martxoaren 8ari begirako antolaketa lanetan hasi.