Gomendio teknikoak eguaztenean, erabakiak eguen edo egubakoitzean

Jon Irizar Aranguren 2022ko ots. 8a, 13:30

Erietxeratze berrien zein hildakoen kopuruak "altuak" direla onartu arren, Bingen Zupiria Eusko Jaurlaritzako bozeramaileak egoera epidemiologikoa duela bi aste baino "baikorragoa" dela adierazi du. Bere hitzetan, eguaztenean bilduko da LABI teknikoarekin Iñigo Urkullu, eta eguen edo egubakoitzerako deituko du, aldiz, LABI instituzionala. Orduan jakingo dira, beraz, otsailaren 13tik aurrera EAEn indarrean egongo diren neurriak.

Astearteroko Gobernu Bileraren ostean Bingen Zupiria bozeramailea soilik agertu da prentsaren aurrera gaur. Bileran hartutako hainbat erabaki izan ditu hizpide, bakarra ere ez osasun egoerari lotutakoa. Kazetarien galderen txandan, baina, egoera epidemiologikoari, LABI batzorde tekniko eta instituzionalari zein musukoaren erabilerari buruz aritu da.

Gotzone Sagarduik bileran egindako balorazioak izan ditu hizpide Zupiriak. Kutsatzeak, positibitatea zein birsortze ratioak behera doazela esan du, baita, "nahi baino astiroago bada ere", ospitaleetan zein ZIUetan dauden herritarrak. Alderdi negatibo gisa erietxeratze berrien zein hildakoen kopuruak "altuak" izaten jarraitzen dutela adierazi du. Ikuspegi orokorretik, baina, balorazio positiboa egin du: "Duela bi aste ez zen garbi atzematen bilakaera, eta neurriak luzatzea erabaki genuen. Oraingoan datuak baikorragoak dira".

LABIak

Indarrean dauden neurriak otsailaren 13an amaitzen direla aintzat hartuta, LABI bileren inguruan galdetu diote kazetariek. Jaurlaritzaren bozeramaileak esan duenez, bihar goizean bilduko da Iñigo Urkullu batzorde teknikoarekin; bilakaera aztertu eta araudien gomendioak ematen dituzten adituekin, alegia. Batzorde instituzionala edo arauak onartzen dituena, berriz, eguen edo egubakoitzean bilduko da: "Arduradun politikoen agenden arabera erabakiko da data zehatza".

Maskara

Espainiako Osasun Ministerioak eta autonomia erkidegoetako ordezkariek musukoaren inguruan hartutako erabakiaz eta Eusko Jaurlaritzako ordezkariaren abstentzioaz galdetuta, denboran atzera egin du Zupiriak: "Aurreko urteko ekaineko edo uztaileko eztabaida beraren aurrean gaude". Eskoletako jolas-orduetan musukoaren erabilera mantentzea edo kentzea, aldiz, Madrilen gaur sinatuko duten dekretuan jasotakoaren arabera erabakiko dutela gaineratu du.

Nafarroa

Nafarroako Foru Erkidegoan otsailaren 14ra arte daude indarrean neurri murriztaileak. Bada, gaur eguerdian Foru Gobernuak jakinarazi duenez, aldatu egingo dituzte neurriok; bihar jakinaraziko dute behin-betiko ebazpena. Ikusteke dago ea malgutu egingo dituzten, edo bertan behera utziko dituzten guztiak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak