Mugaz gaindiko harremanak saretuta, La Unicarentzat lehen Euro Challenge errugbi txapelketa

Bidasoaren bi aldeetako herritarren artean harremanak garatzea eta saretzea helburu, eta errugbia aitzaki gisa hartuta, emakumezkoen lehen Euro Challenge lehiaketa antolatu du Euroeskualdea erakundeak. Mojategin jokatu zen finala domekan, eta Donostiako Termas Bera Bera eta Iruñeko La Unica aritu ziren nor baino nor gehiago. Gipuzkoarrak hobeto zelairatu ziren arren, ez zuten entsegu edo transformaziorik lortu, eta partiduak aurrera egin ahala nafarrak joan ziren gailentzen; azkenean, 19-0, eta Iruñera lehen txapelak. Akitaniako Peyrehorade-Tartas-Chalose eta Lapurdiko Biarritz-Hasparren taldeek ere hartu dute parte txapelketan.