"Ezjakintasuna da nagusi; ez dakizkigu zehazki zeintzuk diren gure betebehar eta mugak", adierazi dio GOIENAri jatetxe bateko arduradunak, telefonoz. Bada abokatu eta aholkularien artean bueltaka dabilenik, bai eta inguruko jatetxeei deitu eta nola egiten ari diren galdezka dabilenik ere.
Badira, baina, ostalarien elkartetik jarraibideak jaso eta bete beharrekoak "argi" dituztenak ere. Eta horien artean da Maider Larrañaga, Arteaga jatetxeko arduraduna. "Presaka egokitu behar izan dugun arren, ongi joan da lehen asteburua gure jatetxean", adierazi du. Covid Check aplikazioa deskargatu dute zerbitzariek mugikorrean, eta bezero berri bat heltzean, banan-banan egiaztatzen diete guztiei pasaportea: "Hamar segundoko lana da pertsona bakoitzeko. QR kodea irakurri, NANarekin izen-abizenak eta jaiotza-data egiaztatu, eta aurrera" . Eta bezeroen harreraz galdetuta, "oso positiboa" izan dela esan du, "zegokien bezala, guztiek ekarri baitute ziurtagiria, eta jarrera onarekin, gainera" .
Hainbat erreserba, bertan-behera
Bi aldeetako iritziek, baina, errealitate berean egin dute topo: erreserbak bertan behera uzten ari dira. "Datorren asteko bezero batek deitu dit, hamaika laguneko taldean txertatu gabe dagoen bat, eta ondorioz, ziurtagiririk ez duen bat dagoela esanez. Eta etortzen ez badira, zer?", galdetu du telefonoz bestalde ostalariak. "Erreserbetan igarriko da, eta guk ere igarriko dugu", esan du beste batek. Arteaga jatetxean ere bizi izan dituzte antzekoak lehen asteburuan. Hala ere, argi mintzatu da Larrañaga: "Lanean jarraitu nahi dugu, ez dugu berriz gelditu nahi. Beraz, neurri murriztaileagoak ezarri baino, nahiago dugu ziurtagiriarekin aurrera jarraitzea".