Justiziak ez du baimendu EAEn 'Covid Ziurtagiri Digitala' eskatzea

Europako zenbait herrialdetan erabiltzen den 'Covid Ziurtagiri Digitala'-ren irudia.

Zenbait tokitan Covid Ziurtagiri Digitala aurkezteko beharra ezartzeko eskaera egin zion Eusko Jaurlaritzak EAEko Justizia Auzitegi Nagusiari. Gaur goizean hartu du justiziak erabakia: ukatu egin dio Jaurlaritzari ziurtagiria eskatzeko baimena. Ondorioz, iragan asteartean Gotzone Sagardui Osasun sailburuak jakitera emandako prebentzio-neurriak daude egun indarrean.

EAEko Justizia Auzitegi Nagusiari Covid Ziurtagiri Digitala aurkezteko beharra ezartzeko baimena eskatuko ziotela iragarri zuen pasa den asteartean Gotzone Sagardui Osasun sailburuak. Ziurtagiria 150etik gorako intzidentzia-tasa duten udalerrietako zenbait jardueratan eskatzea zuen helburu Eusko Jaurlaritzak; zehazki, 50 pertsonatik gorako jatetxeetan zein diskoteka, dantzaleku, musika taberna eta karaokeetan.

Bada, gaur goizean bildu dira Auzitegi Nagusiko magistratuak eskaria ebazteko, eta eguerdian eman dute jakitera erabakia: Iñigo Urkullu lehendakariaren gobernuak ez du baimenik EAEn ziurtagiria eskatzeko.

Jaurlaritzak, baina, badu eskariarekin aurrera jarraitzeko aukera, datozen hiru egunetan erabakiaren gaineko errekurtsoa jartzeko aukera baitu Espainiako Auzitegi Gorenean. Besteak beste, Katalunian, Galizian eta Balear Uharteetan indarrean dagoen neurria da ziurtagiriarena.

Erlazionatuak

78 kasu berri baieztatu dira Debagoienean eguenetik atzora arte

Debagoiena

Eguenetik domekara bitartean, 25 positibo erregistratu dira Arrasaten, 21 Bergaran, hamazazpi Antzuolan, zortzi Oñatin, sei Aretxabaletan et...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.