Aramaion mozorro festa egin zuten kultura etxean, eta ondoren, kaleak apaindu zituzten kalabaza eta kriseiluekin. Horren ostean, ipuin kontalariare istorioak entzun zituzten eta 19:30ean, sorgin dantzak hartu zuen plaza.
Aramaioz gain, Elgeta ere arimek hartu zuten herria egubakoitzean. Hainbat gunetan, Karlista galduaren bila antzezlan ibiltariaren pasarteak egin zituzten seigarren mailako ikasleek nagusiagoak diren hainbat gazteren laguntzarekin. Elgetako kaleetara itzuli ziren Maritxuren, Mikelen eta Txominen arimak.
Eta Arrasaten, Ilargitxorekin kalejira egin zuten, eta ondoren, biltzarra plazan. Kukumarroak, baserritarrak eta beste hainbeste gerturatu ziren, jai giroan, arimen gaua ospatzera.
Zapatuan ere jaiak jarraitu egin zuen zenbait tokitan, besteak beste, Bergaran. Musika eskolakoek Kalabera abestia eskaini zien gerturatutakoei. Eta ondoren, txokolate-jana egon zen San Joxepekoen eskutik. Hain zuzen ere Bergaran ahalegin berezia egin dute ohitura indartze aldera.
