Zabalik dira izen-emateak euskaltegietan

Debagoieneko bost udal euskaltegiak eta egoitza Arrasaten duen AEK-k zabalik dituzte ikasturte berrirako izen-emateak. Herritarrek askotariko laguntzak baliatu ditzakete euskara ikasteko; Bergarako udal euskaltegiko Alex Labaienek eta AEK-ko Oskar Elizburuk eman dute ikasturte berrira begirako asmoen berri.

Euskaltegien eskaintza zabala dago Debagoienean, AEKren eta Udal euskaltegien sareari esker. AEK-k, esaterako, Arrasateko Iturriotz kalean du bailarako egoitza, eta horrez gain Antzuolan edo Elgetan ikastaro konkretuak ere ematen dituzte. Aurtengo matrikulazio kanpainarako aukeratu duten leloa izan da Ikasi euskara, bidelagun onenarekin.

AEK-n zabalik dute izen-ematea irailaren 30era arte eta hainbat modu daude izena emateko: telefonoz, posta elektronikoz edota Arrasateko Iturriotz kaleko egoitza berrira gerturatuz, goizez eta arratsaldez.

Udal euskaltegiak: bost egoitza

Udal euskaltegien sareari dagokionez, bost egoitza daude Debagoienean: Arrasateko Udal Euskaltegia, Arimazubi plazan; Bergarakoa, Irizar jauregian; Oñatiko Bedita Larrakoetxea Udal Euskaltegia, Bidebarrieta kalean; Aretxabaletako Leintz euskaltegia, Nafarroa kalean: eta Eskoriatzako Leintz euskaltegia, Intxartxueta kalean. Sare publikoetan izen emate epea ezberdina da, herririk herri: Arrasaten eta Oñatin, irailaren 24ra arte; Aretxabaletako eta Eskoriatzako kasuan ez dute itxiera epe zehatzik, eta Bergaran, irailaren 28ra arte eman daiteke izena.

Hain zuzen ere, Bergarako udal euskaltegiko zuzendari Alex Labaienek nabarmendu du Udalak ematen dituen diru-laguntzei esker matrikulazioa asko merkatu dela. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.