2019arekin alderatuta, 2020an heriotzek % 12,5 egin zuten gora erkidegoan. Pandemiaren eragina nabarmena izan da, baina ehunekotan, honako hauek izan dira heriotzen arrazoi nagusiak: heriotzen %25,7, (6.223 pertsona) tumoreen ondoriozkoa izan da; %23,1 (5.611) zirkulazio-aparatuko gaixotasunen ondoriozkoa; % 12,8 (3.096) koronabirusaren ondoriozkoa; eta %7,3 (1,774) buruko eta portaeraren nahasmenduen ondoriozkoa. Hots, COVID-19a hirugarren eragile nagusia izan da.
Heriotzen arrazoiak desberdinak dira emakume eta gizonenei dagokienez; gizonen artean, tumoreak izan dira heriotzen arrazoi nagusia, eta emakumeen artean, berriz, gaixotasun kardiobaskularrak. Halaber, Eustatek nabarmendu du nahasmenduen ondoriozko heriotzen artean emakumeen ehunekoa handiagoa dela, eta kontrakoa gertatzen dela kanpo-kausek eragindakoetan, non gizonen ehunekoa handiagoa baita.
Adinei erreparatuta, urtebete baino gutxiagoko haurren kasuan, jaiotza gaixotasunen eta sortzetiko malformazioen ondoriozkoak izan ziren heriotza gehienak. 39 urtera artekoen kasuan, berriz, heriotza-kausa nagusiak kanpo-kausak izan ziren, besteak beste, istripuak eta suizidioak. Bestetik, 40 urtetik 79 urtera bitartean tumoreak izan ziren lehen heriotza-kausa eta, 80tik aurrera, zirkulazio sistemako gaixotasunak.
Hiru urte hazi da bizi-itxaropena
2020an hildako pertsonen batez besteko adina 81 urtekoa izan zen. Datuek erakusten dutenez, hamarkada batean 2,9 egin du gora bizi-itxaropenak. Bestalde, iaz, 100 urteko edo gehiagoko 409 pertsona hil ziren; 2019an baino 31 gehiago.