Azken asteetan Hego Euskal Herrian 190.000 pertsona inguruk eskuratu dutela iragarri dute, 127.500ek EAEn eta 61.600ek Nafarroan. Ez da beharrezkoa izango agiri hori bidaiatzeko baina aldean darmanak kontrolak samurrago pasatuko ditu.
Agiri edo kode hori gailu mugikor guztietan eraman ahal izango da, baita paperean ere.
Hiru ziurtagiri mota daude:
- Txertaketa-ziurtagiria (txertoaren dosi bat edo bi jarrita dutela ziurtatzen dutenei).
- Errekuperazio-ziurtagiria (PCR positiboa izan eta hurrengo 11 eta 180 egun bitartean ematen da).
- Proba negatiboaren egiaztagiria (antigenoen proban 48 ordu lehenago eta PCR proban 72 ordu lehenago proba diagnostiko negatiboa izan duten pertsonei). Proba diagnostikoren kostua eskatzaileak ordaindu beharko du, laborategi pribatuetan egindako proba negatiboek bakarrik izango dutelako balioa.
Ziurtagiri horiek Osakidetzaren webgunean eska daitezke.
Osasun sailburuak adierazi du gainera, ziurtagiria telematikoki lortzerik izan ez duten pertsonentzat, gaurtik aurrez aurre eskuratzeko aukera irekiko dela Zuzenearen hiru bulegoetako edozeinetan, hitzordua eskatuta.
Dokumentua hamabi hilabetez behin berritu beharko da eta Sendagaien Europako Agentziak (EMA) onartutako txertxoentzat balio du; oraingoz, Pfizer-BioNTech, Moderna, Astrazeneca eta Janssen.
