Elikagai bankutik azaldu dute iazko udan ez zutela arazorik izan, pandemiaren eraginez asko oporretan izanda ere etxean geratu zirelako. Aurten, baina, egoera bestelakoa da.
Boluntario profil zehatzik ez dute eskatzen, soilik borondatea erakutsi eta laguntzeko konpromisoa hartzea. Egin beharrekoei lotuta, Bergarako elikagai bankuan bi lan ildo dituztela azaldu dute boluntarioek, eta horietan garrantzitsuena da eguneroko otorduen banaketa. Horretaz gain, 30 lagunek baino gehiagok hilean behin jasotzen duten elikagaien poltsa prestatzea ere badagokie Bergaran aritzen direnei. Bost talde ezberdinetan egiten dute lan, horietako bakoitzak, astean behin.
Interesatuak telefono bidez zein helbide elektronikora mezua idatziz jar daitezke boluntarioekin harremanetan: 943 76 21 90 eta bergara@bancoalimentosgipuzkoa.org.
Azkenik, elikagai bankutik esan dute udaberriko elikagai bilketa urria izan dela aurtengoan, iazkoarekin alderatuta erdia soilik jaso dutelako. Hala, datozen hilabeteetan zein Gabonetako elikagai bilketan dute itxaropena jarrita, eta herritarrei laguntzen jarraitzeko deia luzatu diete.