Madrilgo Gobernuak alarma egoera bertan behera uzten duenerako dekretua prestatzen ari da Jaurlaritza, eta zirriborroa helarazi dio Auzitegi Nagusiari. Urkulluk adierazitakoaren arabera, "orain arte ezarritako neurriak" dira dekretuan jaso dituztenak; tartean, etxeratze agindua eta itxiera perimetrala mantentzea.
Fiskaltza, baina, ez dator bat horrekin eta argudiatu du ezinezkoa dela "eskubide konstituzionalak mugatzea" alarma egoeraren estaldurarik gabe. Bestetik, azaldu du bilkurak gehienez lau pertsonatara mugatzeko arauarekin bat etor litekeela, horrek "ez duelako urratzen" herritarren biltzeko eskubidea. Gauzak horrela, Fiskaltzak txosten bat aurkeztu du Administrazioarekiko Auzietako Salan.
Jaurlaritzak maiatzaren 10ean sartu nahi du indarrean dekretua, eta data horretatik aurrera, Urkulluren gobernuak aukera izango du Auzitegi Gorenera jotzeko; horrek baitu azken hitza.
