Maiatzaren 9an alarma egoera luzatzen ez bada, hilaren 10ean Jaurlaritzak dekretua sartuko du indarrean. Urkulluk adierazi zuen "orain arte ezarritako neurriak" izango direla bertan batuko direnak, eta Zupiriak berretsi egin du hori: "Datozen hilabeteetan neurriak hartzen jarraitu beharko dugula aurreikusi da (…) Ikusi dugu mugimendua, biltze eskubidea eta gaueko ordutegiak arautzea eraginkorra dela".
Azken hitza, Auzitegi Gorenak
Madrilgo Ministroen Kontseiluak errege dekretu bat onartu du gaur, erkidegoen "ziurgabetasun juridikoari" erantzuteko. Hala, maiatzaren 10etik aurrera, erkidegoetako gobernuek Auzitegi Gorenera jo ahal izango dute, Madrilgo Gobernuak bertan behera utzi nahi dituen neurrien aurrean (mugikortasuna, etxeratze agindua edo herritarren bilkuren muga), babesa izateko.