Urretxu-Zumarragatik heldu zen Kutxa Bira Debagoienera, Antzuolara hain zuzen ere, domeka eguerdian. Handik Legazpirako bidea hartu zuen, nahiz eta atzo berriz itzuli zen bailarara. Aretxabaletan egin zioten harrera; goizean, Kurtzebarri eskolan, eta arratsaldean, 18:30ean, Herriko Plazan. Gaur, Aramaiorako bidea hartu eta San Martin eskolan izan da goizean.
Iparra-Hegoa elkarteak udaberriro antolatu ohi dituen ekintzen alternatiba gisa prestatu dute aurtengorako Bizi gira... Kutxa bira ekimena. Diaspora eta hainbat euskal herri euskararen baitan batzeko helburuarekin abiarazi zuten, Argentinako Viedma herrian, martxoaren 20an, eta hala jarraituko du bidea Euskal Herrian barrena, maiatzaren 30era arte, Seguran bukatuko da orduan.
Ekimen horrek egurrezko kutxa bat du oinarri, eta euskara, lurraldetasuna eta bestelako hamaika aldarri batu nahi dira bertan.