"Mugen eta transnazionalen menpeko sistema kolonialista eta arrazistan bizi garela" deritzo mugimendu feministak, emakume arrazializatuek emakume zuriek baino egoera okerragoa bizi dutelarik. Horregatik ikusarazi nahi izan dituzte aurten emakume etorkinen egoera prekarioa eta emakume zurien pribilegioak, pertsonen kontzientzietan ere arrakalak sortzea lehenetsiz.
Arratsaldeko manifestazioak
Arrazoi horiengatik aterako dira bailarako herrietan emakumeak kalera datorren astelehenean. Arratsaldeko seietan daude deituta mobilizazioak Aramaion, Leintz Gatzagan, Aretxabaletan eta Antzuolan, sei terdietan Bergara eta Eskoriatzan eta 19:00etarako deitu dituzte Oñatin, Elgetan eta Arrasaten. Bergaran beste bi kontzentrazio ere egingo dituzte: Duintasuna taldeak deitu du 12:00etan udaletxearen aurrean; Deba bailarako Itaia taldeak, berriz, epaitegiaren aurrean batuko da arratsaldeko 6etan.
Mugimendu feministak garrantzitsua jo du martxoaren 8an kaleko presentzia bermatzea, hori bai, segurtasun neurriak errespetatuz.
Ekitaldi ugari antolatu dira
Mobilizazioetaz gain, emakumearen nazioarteko egunaren bueltan ekitaldi ugari antolatu dira bailaran. Gaur kontsumoa eta indarkeria izeneko hitzaldia eskainiko du Irantzu Varelak Eskoriatzako Zaldibar antzokian, eta bihar Neomak taldeak kontzertua eskainiko du zazpietan herri berean. Domekan, ostera, emakume artisauen azoka egingo dute Oñatin.
Erakusketak ere ez dira faltako, Bergarako Laboratoriumen ireki baitute 30 emakume ahaztezin izeneko galeria. Arrasateko emakume txokoan ere jarri dituzte martxoaren 8ko kartel lehiaketan parte hartu duten artelanak.
Bestalde, aurten Lilatoia lasterketa solidarioan aplikazio bidez parte hartzera gonbidatu dituzte emakumeak. Gaurtik astelehenera bitarte egin ahalko da, bakarka zein taldeka. Emakumeen Mundu Martxako zapiak, bailarako feministek diseinatutakoak barne, bihar iritsiko dira Irun eta Hendaia artera, ekitaldi sinbolikoa irudikatzeko.
