Foru Aldundiak azaldu du, zerga bilketari dagokionez, Gipuzkoak "espero baino emaitza hobeagoekin" itxi zuela iazko urtea. Guztira, 482.048.561 euro jasoko dituzte 2020ko Udalen Finantzaketarako Foru Funtsetik (UFFF). Udalek haien finantzaketarako duten diru iturri nagusia da hori, eta UFFFaren hurrengo ordainketan jasoko dute dirua lurraldeko udalerriek.
COVID-19aren pandemiak sortutako krisiak eragina izan badu ere, 2020koa Gipuzkoak izan duen inoizko hirugarren funtsik handiena da; 2018 eta 2019 urteetakoek bakarrik gainditzen dute.
2,6 milioi gehiago, bailarara
Debagoienera etorrita, –Aramaio kontuan hartu gabe– urrian aurreikusitakoa baino 2.614.006 euro gehiago jasoko dituzte udalerriek. Herriz herri aurreikuspenak zenbat gainditu diren adierazten dute hurrengo zifrek:
- Arrasate: 919.522,25 euro
- Bergara: 608.560,70 euro
- Oñati: 474.086,91 euro
- Aretxabaleta: 291.269,92 euro
- Eskoriatza: 170.887,44 euro
- Antzuola: 88.514,27 euro
- Elgeta: 47.439,41 euro
- Leintz Gatzaga: 13.725,77 euro