136 atzo gaur 123; pixka bat behera egin du positibo kopuruak azken 24 ordutan. Osakidetzak ohartarazi du ospitaleratzeak, udalerrietako kasuak eta R0 indizea astelehenean eguneratuko dutela.
Nafarroan 63 positibo
Nafarroako Osasun Departamentuak jakinarazi du mila gazteri baino gehiagori COVID-19 gaitzaren azterketa egin dietela Iruñeko Mendillorri auzoan. Eguerdian amaitu dituzte auzoko institutuan eginiko probak eta auzoko gazteen jarrera "erantzun on" gisa jo du. Izan ere, 17 eta 28 urte arteko 1.044 gazte joan dira euren kabuz probak egitera. Bi mila gazte inguru zeuden proba egitera deituta, baina departamentuak azaldu du balitekeela asko auzoko ohiko bizitokitik kanpo oporretan egotea.
Hala, auzoan bizi diren gazteen %57,9 aztertu dituzte (2.300 bizi dira). Atzo beste 63 kasu atzeman zituzten Nafarroan, aurreko egunean baino 30 gutxiago. Horietako sei, batez ere Mendillorri auzoan zabaldutako Iruñeko agerraldiari dagozkio. Beste bat Tuteran ospaturiko ezkontza batean sorturiko agerraldikoa da, eta beste bat Iruñerriko Iturrama auzoko kasuetakoa.
Beste agerraldi baten berri ere eman du departamentuak eta Nafarroako Erdialdeko herri batean sortu dela adierazi du; ez dute, ordea, zein herri den zehaztu. Horrez gain, Iruñean beste lau kutsatze foku atzeman dituzte.