Martxoaren 14ko Errege Dekretuaren ondorioz, negozioa itxi behar izan duten langile autonomo eta negozio daude, eta horientzat zuzendutako neurriak hainbat dira. Ministroen Kontseiluak, atzo, onartu zituen langileak kaleratu beharrean aldi baterako enplegu-erregulazioko espedienteak (ERTE) jasotzen dituzten enpresei kotizazioak ordaintzetik salbuestea; neurri horrekin enpresen finantza-kargak arintzea asmoa izanik.
ERTE guztiak ezinbesteko kasuetan egindakotzat joko dira, eta kaltetutako langile guztiek langabezia kobratzeko eskubidea izango dute, horretarako eskatzen den gutxieneko kotizazio aldia bete ez arren. Gainera, ez da kontsumitutzat joko prestazio hori jasotzen emandako denbora (zeroko kontagailua).
Dekretuak, gainera, telelana bultzatzen du, eta langileei beren ardurapeko pertsonak zaintzeko lanaldia egokitu edo murrizteko aukera emango die, eta posible izango da lanaldia % 100 murriztea. Pedro Sanchez presidenteak aurreratu zuenez, autonomoek jarduera uzteagatiko prestazioa jasotzeko aukera malgutuko da, eta langabeziara doazen autonomoei kotizazioak ordaintzetik salbuetsiko da.
Hilabeteko kuotak ordaintzen jarraituz
Besteak beste, langile autonomoek hilabeteko kuotak ordaintzen jarraitu beharko dutela da azpimarratzekoena, eta horren aurrean, irtenbidea ERTE-ak eskatzea dela adierazi du Naiara Mendibil Zenbakiko enpresako abokatuak:
"Autonomo ezberdinak daude; negozio batzuk itxi behar izan dute, beste batzuk, ez dute behar hori, baina itxi beharra izan dute egoera honengatik. Egunero aldatzen doaz gauzak, baina, atzo jarritako neurrien gainean, autonomoei dagokienez, urteroko kuotak ordaintzen jarraitu behar dutela da azpimarratzekoa."
Arazoak lan delegaritzako webgunean
Mendibil abokatuak gaineratu duenez, ERTE eskakizun kopuru handiagatik "Lan delagaritzako web orrialdea arazoak izaten ari da. Ez dakit jendea masiboki ari den eskaerak egiten edo zer, baina, blokeatu egiten da. Telematikoki egin beharra dago eskaera, eta beraz, pazientziaz hartu beharko dugu".
