Euskal kantak, koreografiak eta giro ona izan ziren protagonistak zapatuan eta domekan grabatutako zortzi saioetan. Lau zapatuan eta beste lau domekan. Parte hartzaileek gustura bukatu zuten. Aurrez, gogor entseatutako kantuen eta koreografien jarraipen zuzena egiten egon ziren parte-hartzaileen etxekoak. Gurasoak, lagunak, senideak… Lepo bete zen Arkupeko aretoa, neska-mutikoen lana txalo zaparradaz saritzeko.
Gonbidatuak
Bestalde, VII. Kantariko Aretxabaletako saioan gonbidatu bereziak egon ziren. Alde batetik, Lekaixoka bertso eskolako kideak; eta beste alde batetik, Jaiki dantza taldeko kideak. Azken horiek, Mikel Laboaren kantu bat dantzatu zuten.
Grabaketak egin ostean, asteburu honetan hasiko dira emititzen saioak, Goiena telebistan. Lehenengoak, Oñatin grabatutakoak izango dira.