Debagoieneko herrietan arituko dira 9 autobus hibrido berriak. Gasteizera eta Eibarrera ere iritsiko dira; ez ordea, Donostia edota Bilbora.
Datozen egunetan, autobusak matrikulatu bezain pronto batuko dira Lurraldebuseko zerbitzura, eta Avanza taldeko arduradunek aurreratu dutenez, bederatzi hauetaz gain, urte honetan zehar beste 20 autobus hibrido ere jarriko dituzte Lurraldebusen zerbitzura.
Autobusen ezaugarriei dagokienean, gehienez ere 70 bat pertsona garraiatu ahal izango dituzte; eta horietako 52 joan ahalko dira eserita.
Mugikortasun jasangarriaren alde egindako azken apustua da honako hau; ingurumenari mesede egiteko asmoz aukeratu dituzte autobus hibridoak, eta azaldu dutenez, CO2 emisioak gutxitzen lagunduko dute. Horretaz gain, erregaian aurrezteko aukera ere emango dute hibridoek.