Sariok, Enplegu eta Gizarte Politiketako sailburu Beatriz Artolazabalek, Hezkuntza sailburu Cristina Uriartek eta sailburuorde Estibaliz Hernaezek eman dituzte, besteak beste, Euskaliteko Presidentearekin, Jose Hernandezekin batera. Lehendakari Iñigo Urkullu ere izan zen ekitaldian.
Modu horretan, praktika aurreratuak eta Goienak bere interes taldeekiko –bezeroak, pertsonak, bazkideak eta gizartea, besteak beste–, duen asebetetze orekatua saritu dizkio Euskalitek Goienari. Aurten Euskaliten aitortza jaso duen Debagoieneko enpresa bakarra da Goiena; horrez gain, Tubax-ek, Potrón Electrónicak, Spri Agentziak eta Mercabilbaok ere jaso dute Zilarrezko A saria gaurko ekitaldian.
Goienari emaniko saria pozarren jaso du komunikazio taldeko zuzendari Iban Arantzabalek. "Oso pozik gaude, aitorpen inportantea delako guretako. Goienako lankideak, Goienako gainerako bazkideak, Debagoieneko gizartea, bezero komertzialak, irakurleak, ikus-entzuleak, erabiltzaileak… Uste dugu denon saria dela eta bakoitzari zati bat dagokiola".
Erakundeen emaitzak hobetzeko
Euskalit Fundazioak dioenez, sariaren helburua Euskal Autonomia Erkidegoko kudeaketako erakunde aurreratuenak identifikatzea da "kudeaketa aurreratua lehiakortasunaren funtsezko elementu gisa ezartzearen garrantziaz sentsibilizatzeko".
Euskaliteko Ebaluazio Kluba osatzen dute modu altruistan elkarlanean aritzen diren 2.000 zuzendarik eta teknikarik baino gehiagok. Goienan, zazpi kanpo-ebaluatzailez osatutako taldea ibili da lanean eta guztira 22 elkarrizketa egin dituzte.
Diplomak
Bestalde, Debagoienetik, Emun kooperatibak eta Arrasate Institutuak diploma jaso zuten. Sariak Olatz Dorronsoro baliabideetako arduradunak eta Institutuko zuzendari Maite Lasak jaso zituzten.
