Arantzazun batutako kristau komunitateko kideek salatu dute, Munillaren eredua "inposizioan, klerikalismoan eta jauntxokerian" oinarritua dagoela, Vatikanoko II. Kontzilioaren aurreko eliza ereduan, alegia.
Arrasateko Kristau Taldeko kide Andoni Uribetxeberriak azaldu duenez, "gaur argi ikusi da Gipuzkoako eliza oso bizirik dagoela", eta Munilla iritsi aurreko "hamarkada guztietan egindako lana ez dela suntsitu eta ez dela suntsituko".
Batasuna aldarrikatzera
Izan ere, Gipuzkoako elizbarrutia zatituta dago eta horren batasuna aldarrikatzera ere etorri dira Arantzazura. "Otoitz egitera etorri gara, jainkoari batasuna eskatzera, gorroto gabe eta Vatikanoko II. Kontzilioari jarraituz".
Gipuzkoako Kristau Elkarteak, Setien gotzainak jarraitu zuen bide-orri kontziliotarra defendatu du, euren esanetan, "ebanjelioa bizitzeko era anitz dago baina dena ez da balekoa". "Ezin dugu eraman Jesusen espirituaren antipodetan dagoen gotzaina eta behartzen ari den Eliza atzerakoia, non gotzain-boterearen abusua gailentzen zaion zerbitzu jarrerari: non negozioa eta dirua egitea diren gakoa, pobreentzako Elizaren keinu eta ekintzak beharrean; non manipulazioa eta gezurra nagusitu diren, egiari errespetua ordez; eta hobetsia dirudien gure herrian errotutako Elizak baino Gipuzkoan arrotza denak".
