Aitor Ugarte aramaioarra, munduko txapeldun mendiko lasterketan

Abuztuaren 2tik 4ra mendiko lasterketen munduko kopa jokatu da Italian eta bertan izan dira Ainara Uribarri oñatiarra eta Aitor Ugarte aramaioarra. Azken hau gainera, munduko txapelduna izan da bere kategorian, gazte mailan, alegia.

Munduko txapelduna

Aramaioarrak lasterketa bertikala eta lineakoa egin zituen, bietan bigarren sailkatu zelarik. Lasterketa bertikalean 41:25 minutu behar izan zituen aramaioarrak helmugara iristeko. Lineakoan berriz, ia bi ordu behar izan zituen helmugaratzeko. Hala, Ugartek lehen postua lortu zuen sailkapen orokorrean eta munduko txapelduna da gazte mailan. Honen harira honakoa adierazi du aramaioarrak: "Gogotsu nengoen txapelketa honetan parte hartzeko eta oso pozik nago lortutako emaitzekin". Sailkapena hemen.

Aitor Ugarte, munduko txapelduna Italian. (Irudia: Internal Skyrunning Federation)

Ainara Uribarri

Uribarri hamaikagarren postuan sailkatu zen bi lasterketetan eta sailkapen orokorrean berriz, hamargarren. Horregatik, oñatiarra pozik azaldu da Italian bizitako esperientziarekin: "Mundialerako ondo prestatu nintzen eta gogotsu nengoen parte hartzeko. Aitor Ugartek esan bezala, esperientzia izugarria izan da".