Goiaz! Debagoieneko Lanbide Heziketaren helburu nagusia, hasieratik izan da, Lanbide Heziketa ezagutzera ematea eta lan-merkaturako balizko aukera bezala aurkeztea; bereziki gazteei, baina baita langileei, gurasoei eta orokorrean herritarrei ere.
Gaur egun bailarako Lanbide Heziketako zazpi ikastetxeetan 1.200 ikasle baino gehiago daude matrikulatuta, 24 ziklotan. Amaia Irizarrek adierazi du gainera, "kalitatezko" eta "beharrezko" heziketa dela. Aurtengo berrikuntzetako bat izan da, egin dituzten bisita gidatuak espezializatuagoak izan direla.
Atzo arratsaldean, esaterako, batez ere gurasoei eskainitako solasaldi bat izan zen eta bertan Lanbide Heziketako lau ikasleren esperientziak ezagutzeko aukera izan zuten. Gurasoen kezkak argitzeko baliagarria izan zen.
Ikasleen euren esperientziak entzun ahal izan zituzten eta Lanbide Heziketak eskaintzen dituen aukerak nabarmendu zituzten.
Bi egunotan DHBko 300 ikasle inguru izan dira azokan ikastetxeetatik eta EPAko hainbat ikasle ere izan dira eskaintza ezagutzen.
