“Urtero bezala, Erregeen ostean hasi gara beherapenekin. Normalean %20 edota 30eko deskontuekin ekiten diogu, eta aurrerago, beherapenak igotzen joango gara”, horixe adierazi du Arrasateko Sikol dendako Yolanda Sanchezek. Orain, dena dela, bezeroak Gabonetako oparien aldaketekin ari direla gaineratu du: “Hasiera honetan, bereziki Gabonetako oparien aldaketak egiten ari gara; Olentzerok edo Erregeek asmatu ez duten hori aldatzera etortzen dira; neurri edo modeloa aldatuaz. Eta aurrerago hasiko gara beherapen handiagoekin”.
Badira, bestalde, neguko beherapenak ofizialki hasi barik zeudenean, dagoeneko deskontuekin hasi ziren dendak ere. Horietako bat da Bergarako Mirari jantzi denda: "Urtarrilaren 2an hasi ginen gu, izan ere, jende gutxi zebilen eta erabaki hori hartu genuen. Gabonak dagoeneko ez dira izaten lehenagoko modukoak; jendea kanpora joaten da erostera, Internetetik ere erosten dute, eta orduan negozio txikia geroz eta okerrago doa", azaldu du dendako Mila Manobelek. Hala ere, gaineratu nahi izan du dendarien elkarteetatik herriko bezeroei tratu berezia eskaintzen dietela, erosketak egiterako orduan, erraztasunak jarriaz: "Bedelkarreko txartelarekin erosiz gero, %5eko deskontua daukazu. Horrez gain, hiru edota sei hilabetetan, epeka ordaintzeko aukera ere ematen dugu, bezeroari errazagoa egiteko".