Debagoieneko Gurutze Gorriak laguntza produktuen doako zerbitzua jarri du martxan

Debagoieneko Gurutze Gorriak egitasmo berri bat jarri du martxan urria amaieran. Zerbitzu honekin, beharra izan dezaketen pertsonen eskura utzi nahi dituzte laguntza produktu ezberdinak (gurpildun aulkiak, makuluak…), eta era berean, jendeak erabiltzen ez dituen laguntza produktuak ere jaso nahi dituzte.

 

Egitasmoaren helburua, jendearen beharrei erantzutea da. Gurpildun aulki edo makuluen beharra izaten du jendeak denboraldi baterako, eta behar horiek asetzeko jarri dute martxan ekimena. Eskaintzen dituzten produktuak, pertsonek izan ditzaketen mugak prebenitu, konpentsatu, edo arintzera zuzenduak daude.

Egitasmoaren prozedura

Elene Ibarrondo Debagoieneko Gurutze Gorriko boluntarioaren esanetan, prozedura honakoa da: "Lehenengo eskaera bat jasotzen dugu, norbaitek beharra duena eskatuz. Gurekin harremanetan jartzen da, eta behar duen laguntza produktua eskura badaugu, mailegutzan uzten da. Epea hiru hilabetarako da, baina beharren arabera luzatu daiteke. Ez dugu ziurtatzen erantzuna beti baiezkoa izango denik, baina materiala badugu utzi egiten dugu. Horrez gain, etxean norbaitek taka-taka, gurpildun aulki edo makulurik badu, eta egoera honean badaude, hauek jasotzera joaten gara, edo hona ere ekar dezakete, hau da Elorregiko bulegora".

Orain arte, lau gurpildun aulki, taka-taka bat, eta hiru makulu pare jaso dituzte, eta batez ere, aulkien beharra dutela azpimarratu du Ibarrondok.

Eskaera egiteko edo produktuak emateko

Laguntza produkturen bat jaso edo eman nahi duenak, edo informazio gehiago nahi izan ezkero, Debagoieneko Gurutze Gorriko telefonora 943 76 55 76 deitu edo emailera altodeba@cruzroja.es idatzi daiteke.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.