Rikardo Arregiz (1969) gero mugarri izan diren hamar ekimen identifikatu ditu Rikardo Arregi Kazetaritza Sariaren epaimahaiak; horien artean gazteena, Goiena Komunikazio Taldea da.
"Goiena, tokiko kazetaritzan eta komunikazioan aitzindari aparta"
2000. urtean, Goiena Komunikazio Taldea sortzeko Debagoieneko hainbat medioren batura gauzatu zen: Arrasate Press, Berrigara, Goibekokale, Aretxagazeta, Kontuola eta Ze barri?.
Baina epaimahaiak nabarmendu nahi izan du, komunikazio taldeak lortutakoa bilketa eta batura hutsetik harago doala: "Emaitza kalitate, irismen eta ikusgarritasun handiko multimedia egitura izan da, paperezko euskarri klasikoetan –Goiena eta Puntua astekariak–, Goiena telebistan, Arrasate Irratian edo Goiena argitalpen eta zerbitzu digitaletan berealdiko oihartzun eta eragina sortu duena eskualdean eta baita eskualdetik kanpo. Goienaren argitalpen eta ekoizkinak tokian tokikoak izateaz gain, asko eta asko kalitate eta ontasunez eskualdeaz gaindi noranahiko eredu dira ere gaur egun."
Iban Arantzabal, Goienako zuzendari nagusiak jaso du saria. Beste tokiko komunikabideentzako izan dira Arantzabalen lehen hitzak, sariaren zati bat haiena ere badela esan du, eta bereziki eskaini die saria Tokikom osatzen duten komunikanideei. Goiena kooperatiba bat dela ere gogoratu du taldeko zuzendariak, eta hain justu kooperatibako parte diren guztien garrantzia azpimarratu du; Debagoieneko udalak, euskara elkarteak, kolaboratzaileak...
Goiena aukeratzeko epaimahaiaren hiru arrazoi nagusiak:
- Eskualde mailako egitasmo bateratua osatzea, guztiz sinergikoa, euskarazko kazetaritza eta komunikazioaren ikuspegi eta ekimen osoa bere esku hartu duena, tradizionala zein gaurgerokoa, bikaintasunez.
- Gizarte eta kultura eragile gehienak bere baitara erakarri ditu, eskualde osoan Goiena gertakari sozial bihurtuz eta horri eutsiz gizarte oinarri oso zabaleko enpresa egitura baten bidez.
- Tokiko administrazioak ekimenaren kudeaketara bildu ditu, haiek ere partaide eginez zeharkakotasun handiko kudeaketa batean, eta egitasmo berrien sorgune bihurtu da, maiz eskualdea gaindituz.
Epaimahaia
Mahaiburua: Ainara Rodriguez Zalakain.
Mahaikideak: Miren Azkarate, Jose Inazio Basterretxea, Allande Boutin, Aingeru Epaltza, Elixabete Larrinaga, Jon Unanue, Arantxa Urretabizkaia, Aitor Zuberogoitia.
Idazkaria: Patxi Baztarrika.
