Altsasuko gazteen kontrako epaia salatzeko mobilizazioa Arrasaten

Kale agerraldi jendetsua egin dute gaur, egubakoitza, Arrasaten, Altsasuko gazteen epaiaren kontra. Bi eta hamahiru urte arteko kartzela zigorra ezarri dizkiete zortzi gazte nafarrei, eta hori salatzeko manifestazioa egin dute, Seber Altubetik abiatuta. Bihar, zapatua, kontzentrazioa egingo dute Oñatin, 13:00etan plazan.

Altsasuko auzian zigortutako zortzi gazteen kontrako epaia salatzeko deialdia egin dute AGAKO, Ikasle Aberztaleak, Sortu, Askapena eta Euskal Herrian Euskaraz taldeek, "mendekuan oinarritutako sententzia" dela esanda, eta "euskal gazteriaren, eta oro har, Euskal Herriaren aurkako eraso" bezala ulertzen dutelako. 

Mobilizaziorako ez dute asti handiegirik izan, gaur, egubakoitza, jakinarazi du-eta epaia Auzitegi Nazionalak; Euskal Herri osoan dabiltza deialdi ezberdinak egiten, epaia bera salatzeko. Ekintza terrorista izan ez dela ebatzi badute ere, bi eta hamahiru urte bitarteko zigorra ezarri die Espainiako Auzitegi Nazionalak epaitutako zortzi gazteei. Lesioak, desordena publikoak eta mehatxuak egitea egotzi die epaimahaiak. 

Arrasaten gaur, egubakoitza, egin dute kale agerraldia, baina biharko kontzentrazioa deitu dute Oñatin, 13:00etan plazan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.