Indarrak parekatuta Antxintxika Krosean

Xabier Urzelai 2017ko urr. 27a, 16:00

Azaroaren 4an egingo dute Soraluze eta Bergara batzen dituen lasterketaren 13. edizioa. Aurrean lehia polita aurreikusten dute antolatzaileek: "David Gartzia lesionatuta egon da eta Aitor Mimentza indartsu dago", dio Aitor Rementeriak

Aurten ere kuadrilla galanta batuko da Antxintxika Kroseko irteera puntuan: "Izen-ematea martxa onean doa, dagoeneko 130 lagunek eman dute izena", dio Aitor Rementeriak (Kirolprobak.com).

Ibilbidean, berriz, aldaketa txiki bat izango da, 10.000 metroak zorrotz betetzeko, lasterketa apur bat luzatuko dute Bergarako kaleetan: Kruz Gallastegi kalean gora egin eta Irizartik jaitsiko dira Ibargaraiko zuzenera.

Mikel Crespo saria

Bestalde, abuztuan Pirinioetan zendu zen Mikel Crespo gogoan izango dute: "Antxintxikako kide zen Mikel, aurten hiru lasterketa eginak zituen, eta hemendik aurrera haren izena izango duen saria emango diegu ibarreko gizonezko eta emakumezko azkarrenei". Horrekin batera, atletismoko epaile zen Jose Ramon Petreñas arrasatearraren omenez minutu bateko isilunea gordeko dute lasterketa hasieran: "Inoiz ez zuen gure lasterketan kalerik egin".

David Gartzia zortzigarrenaren bila

"Antxintxika Krosa nire lasterketa da", esan ohi du lasterketa zazpitan irabazi duen David Gartziak. "Aurten, baina, lesionatuta ibili da eta behar den moduan entrenatu barik dator gurera", dio Rementeriak. Baina duela bi urte ere urte zaila izan zuen, eta gurean irabazi egin zuen. "Ikusteko dago; izan ere, Aitor Mimentza indartsu dabil. Borroka egongo da aurrean".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak