Elkartasun Egunaren bigarren geltokia zapatuan

Euskal presoen egoeraz ohartarazteko egiten den jaialdiak pasa den zapatuan egin zuen lehen geldialdia. Goizean aurkezpen ekitaldia egin zuten, eta ostean lau talderen kontzertuak egon ziren Gaztetxean. Aurten, lehen aldiz, bi eguneko egitaraua egin dutela salatu dute antolatzaileek, udal gobernuarekin izandako arazo bat tarteko.

"Aurten bi egunetan egin behar izan dugu Elkartasun Eguna, batez ere, daukagun Udaletxe zoragarri honi esker. Guk printzipioz, irailaren 9rako antolatu genuen dena, baina ez gaituzte kontuan hartu. Gure gainetik beste azoka bat antolatu dute (Erdi Aroko azoka), guri ezer esan gabe" adierazi zuen Aitor Urizar antolatzaileak.

Aner Elorza antolatzaileak aditzera eman zuen, euskal presoen kolektiboak salbuespen neurriak jasaten jarraitzen duela. "Presoen eta hauen familien sufrikarioak ez du etenik; errepideko istripuak, larriki gaixo dauden presoen osasun asistentzia desegokiak, ukatutako baimenak, trasladoak, isolamenduak, eta ehunka kilometrotara sakabanatzen dituen dispertsio politika krudela".

Gaur egun, 332 preso daude 65 espetxetan banatuta, eta horietatik bi bakarrik daude Euskal Herriko espetxetan. Aurtengo Elkartasun Egunean, preso horien seme-alaben egoeran jarri nahi dute fokua, eta berriki zendu den Kepa del Hoyoren semearen kasua jarri zuten adibide gisa.

Beraz, aurtengo jaialdiak zapatuan, hilak 16, izango du jarraipena askotariko ekintzekin. Urizarrek, 19:30ean presoen, iheslarien eta errefuxiatuen eskubideen alde egingo den manifestazioa nabarmendu zuen, eta bertan parte hartzera animatu zituen herritarrak. Herri bazkarira joan nahi dutenek, Basati, Taupa eta Monte tabernatan izango dute txartelak aldez aurretik erosteko aukera, 13 euroren truke.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.