Brasil, Bolivia eta Ekuadorren zehar egindako bidaiaren inguruko diaporamarekin irabazi du Murgoitiok. 2015ean Mundukide fundazioaren bitartez joan zen Hego Ameriketara praktikak egitera, eta hango errealitateak aztertzera. Hango nekazariek dituzten bizi baldintzen gainean eta indigenen egoeraren inguruan berba egin zuen, baita Brasileko MST mugimenduaren funtzionamendu ereduaren gainean ere.
Laugarrena, arrakastatsuena
Ostegun Bidaiariak ekimenak lau edizio arrakastatsu bizi izan ditu dagoeneko. Aretxabaletako Udalak, Arteman Komunikazioaren laguntzarekin, sortutako ekimena da eta Debagoienean jaio edo bizi diren gazteen bidaia esperientziak jende artean partekatzea eta aste barruan Aretxabaletan aisialdirako proposamen entretenigarriak eskaintzea du helburu.
Debagoieneko bidaia-zaleen artean ondo errotutako ekimena dela iragarri dute antolatzaileek: "Gero eta jende gehiagok hartzen du parte bidaiak kontatzen eta baita kontakizunak ikusten ere, eta aurtengoa edizio jendetsuena izan da". Publikoa aurreko edizioetan baino "gazteagoa" izan dela gaineratu dute: "Ondorioz, antolatzaileok egin dugun balorazioa oso ona da".