Herri galdeketa

Jon Goikoetxea: "Motorrak berotzea eta jendea animatzen joatea da garrantzitsuena"

Josu Bilbao Atxutegi 2016ko eka. 6a, 17:11

Debagoiendarren herenak erantzun du erabakitzeko eskubidearekin lotuta helarazitako gonbitari. Bestela esanda, botoa emateko eskubidea zuten 16 urtetik debagoiendarren ia %30ak parte hartu zuen atzoko herri galdeketan eta horien artetik %27k baiezkoa eman dio Euskal Herriak estatu independentea osatzeren aldeko aukerari.

Ezusteko barik, eta aurreikusitako moduan gauzatu da independentziaren gaineko herri galdeketa Debagoienean, Aramaion barne. 09:00etan zabaldu zituzten hautetsontziak, eta halakoetan ohikoa den moduan, bereziki eguerdi partean eta arratsaldeko azken orduan izan zuten mugimendurik handiena herri galdeketa ahalbidetzeko lanean jardun zuten 650 bat boluntarioek.

Kontaketa amaituta, emaitza da bozketara gonbidatuta zeuden 16 urtetik gorako ia 55.000 herritarretatik herena joan zela atzo Debagoieneko bederatzi herrietako bozkalekuetara. Emaitza eskasa da hori batzurendako, oso ona, berriz, beste batzurendako. Antolaketan jardun duen herri mugimendua, azken horien artean kokatzen da eta Euskal Herriaren aurretik bide bera landu duen Katalunian izandako hasierako emaitzekin egin du konparaketa Jon Goikoetxeak, Erain Debagoienako komunikazio taldeko bozeramaleak.

Herri galdeketan egindako galderak jasotako erantzunari dagokionez, berriz, independentziaren alde bozkatu du parte hartu dutenen herritarren %27ak.

Hau guztiau gauzatu ahal izateko, Erain Debagoiena bera osatu duten herritarrez gainera, boluntario sare handia mugitu zen atzo, eta jakina, baina aurreko asteetan ere. Eskerrak eman gura izan dizkiete guztiei.

Debagoienekoa eginda, herri ekimen hau hasiera besterik ez dela azpimarratu dute behin eta berriro antolatzaileek, olatu txiki bat, laster etorriko den bigarren olatu bat elikatuko duena. Domino efektua lortu gura dute, hain justu ere.

 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak