Ahozkotasuna berpiztu eta mantentzeko festa egingo da hirugarrenez Antzuolan. Oihulari Clown taldeak eta Udalak antolatuta, Ahotik Bihotzera ekimenak helburua dauka, istorio eta ipuinen transmisioan zubi izatea.
Oihulariko Virginia Imazek ahozkotasunaren garrantzia azpimarratu du eta oroimena eta nortasuna ez galtzeko ezinbestekoa dela ahozkotasuna bermatzea gaineratu du.
Egitaraua
Egun osoko festa antolatu dute apirilaren 17rako, domekarako. Adin guztiendako irekia dena eta askotariko istorioak kontatzeko ateak zabalik dituena. 13:00etan bertso-ipuin poteoa egingo dute tabernaz taberna. Arratsaldean, 18:30ean, Torresoroan bilduko dira parte-hartzaileak ahozkotasunaz gozatzeko. Izena emateko epea zabalik dago udaletxera jota; baina egunean bertan parte-hartzera animatzen den edonork ere aukera izango du. Gogoratu Debagoiendar orori egin gura diela Oihulari Clownek gonbidapena.
Ipuinak kontatzen ikasteko tailerra
Haurren heziketan ipuinek duten garrantzia ulertzen laguntzeko, Virginia Imazek, hitzaldi bat emango du eskolako aretoan apirilaren 6an, eguaztena, 19:30ean. Hitzaldia, ipuinen balio pedagogikoaz jabetzeko da. Ipuinen inguruan zerbait gehiago ikasi nahi dutenentzat zuzendurik dago. Oraindik gehiago ikasi nahi duenak (ipuinak zelan kontatu edo zelan hobetu kontakizuna) Imazek, apirilaren 11n, 17:00tatik 19:30era, oinarrizko tailer bat emango du, eskolako aretoan.