Gaurtik astelehenera bitartean, Aste Santuko oporrak direla-eta, Irungo ordainlekutik 163.000 ibilgailu igaroko dira bi noranzkoetan. Horixe da AP-1 eta AP-8 autobideak kudeatzen dituen Gipuzkoako Azpiegituren Agentzia Bidegiren aurreikuspenena. 163.000 ibilgailu horien %45a Iparralde-Frantziara joango da eta beste %55ak Behobiatik Bilborako noranzkoa hartuko du.
Ibilgailuen gorakada handienak
Frantzia noranzkoan ibilgailuen gorakada handiena biharko espero da, eguenerako, eta Bilborantz, berriz, etzirako, egubakoitzerako, Frantziako lehen opor egunerako, hain justu ere. Bestetik, Bidegiren aurreikuspenen arabera, Zarauzko ordainlekutik, 191.000 ibilgailu igaroko dira sei egun hauetan.
Neurriak, itxaron denborak murrizteko
Aurreikuspen horiekin eta mugimendu gehien dituzten egunei begira, Bidegik Irun eta Zarauzko ordainlekuetan langile gehiago izango ditu kabinak irekita mantentzeko, eta ondorioz, trafikoa arintzeko eta sor daitezkeen itxaron denborak murrizteko. Eta egun hauetako joan-etorriak errazteko, bertan behera geratuko dira autobideetan egiten ari diren lanak.
Informazio gehiago
Bestalde, gogorarazi dute Biriatuko mugan gobernu frantziarrak ezarri ditzaken segurtasun neurriak direla-eta, auto-ilara "handiak" sor daitezkeela Frantzia noranzkoan. Horregatik, mugaz-gaindiko joan-etorriren bat aurreikusita dutenei gomendatzen die informatuta egotea, bai Eusko Jaurlaritzako Trafikoko webgunean, Twitterren, Bidegiko webeko mapan edo 011 telefonoan.